Fyrirhuguð hækkun muni stórskaða ferðaþjónustuna

Enduskoðunarfyrirtækið KPMG segir að fyrirhuguð hækkun á virðisaukaskatti á ferðaþjónustu muni stórskaða greinina. Athugun fyrirtækisins leiddi í ljós að hótelrekstur hér á landi er mjög þungur, og staðan er verri á höfuðborgarsvæðinu heldur en á landsbyggðinni.

Endurskoðunarfyrirtækið KPMG kynnti í morgun afrakstur vinnu sem fyrirtækið lagði í, fyrir Samtök ferðaþjónustunnar, til þess að meta áhrif breytinga á virðisaukaskattslöggjöf á hótel og gistiþjónustu. Eins og fréttastofa hefur greint frá, og fjallað hefur verið um ítarlega undanfarnar vikur, vilja stjórnvöld hækka virðisaukaskatt á gistiþjónustu úr 7 prósent í 25,5 prósent. Þessu hafa Samtök ferðþjónustunnar mótmælt harðlega.

Alexander Eðvarðdsson, sérfræðingur hjá KPMG, segir það hafa komið á óvart hversu þungur reksturinn hjá fyrirtækjum í hótelrekstri væri erfiður.

Ýmsar forsendur hótelrekstrar á höfuðborgarsvæðinu eru oft erfiðar viðureignar, t.d. hár húsnæðiskostnaður og mikil skuldsetning. Alexander segir að athugun KPMG hafi leitt í ljós að hækkunin muni alltaf valda greininni erfiðleikum, sem skili sér í verri afkomu, á endanum einnig fyrir ríkissjóð.