Skattborgarar greiða hálfa milljón fyrir hvern íbúa Álftaness

Skattgreiðendur munu bera 1.214 milljóna króna kostnað af sameiningu Garðabæjar og Álftaness í gegnum Jöfnunarsjóð sveitarfélaga. Kostnaðurinn fer í fjárhagslega endurskipulagningu Álftaness en stór hluti framlaganna er háður því að sameiningin fari fram.

Þetta kemur fram í Viðskiptablaðinu í dag þar sem vitnað er í greinargerð um fyrirhugaða sameiningu sveitarfélaganna. Þar segir að aukaframlag Jöfnunarsjóðsins til Álftaness muni nema 449 milljónum á árunum 2011-2013, framlag vegna skuldaerfiðleika verði 285 milljónir króna í ár, skuldajöfnunarframlag muni nema 450 milljónum á árunum 2012-2015 og framlög til endurskipulagningar á stjórnsýslu og þjónustu verði 30 milljónir. Við það leggjast svo 9 milljónir til undirbúnings sameiningarinnar.

Stór hluti þessara framlaga er háður því að Álftanes og Garðabær verði sameinuð og því má segja að fjárhagsleg endurskipulagning Álftaness standi og falli með sameiningu sveitarfélaganna, en íbúar sveitafélaganna munu kjósa um hana þann 20. október.

Á Álftanesi búa um 2.400 manns og því mun kostnaður Jöfnunarsjóðsins nema um hálfri milljón króna á hvern íbúa. Jöfnunarsjóður sveitarfélaga er að mestu leyti kostaður af íslenska ríkinu. Miðað við ársreikning sjóðsins árið 2010 koma tveir þriðju hlutar fjársins frá ríkinu og einn þriðji frá sveitarfélögum.