Milljarðaaukning í veltu með atvinnuhúsnæði milli ára

Mikil velta var með atvinnuhúsnæði í ágúst sl. Þannig nam velta með atvinnuhúsnæði á landinu öllu rúmum 11 milljörðum kr. í ágúst en veltan var 4 milljarðar kr. í ágúst í fyrra.

Þetta kemur fram í Morgunkorni greiningar Íslandsbanka. Þar segir að hins vegar fækkar samningum milli ára. Samtals voru gerðir 76 samningar um atvinnuhúsnæði í ágúst sl. en í ágúst í fyrra voru samningarnir 90 talsins. Samningunum fækkar því um 16% á sama tíma og veltan nærri þrefaldast.

Þegar litið er til fjölda samninga á landinu öllu fyrstu átta mánuði ársins hafa samtals verið gerðir 1.028 kaupsamningar og afsöl um atvinnuhúsnæði, en á sama tíma í fyrra höfðu verið gerðir 758 samningar og hefur veltan á þennan mælikvarða því aukist um 35% á milli ára.

Það sem af er ári nemur veltan rúmlega 58,3 milljörðum kr. og hefur hún aukist um 27% frá sama tímabili fyrra árs.

Markaðurinn með atvinnuhúsnæði virðist vera að glæðast nokkuð eftir mikla og djúpa lægð í kjölfar hrunsins, en þessi markaður hefur átt mun erfiðara uppdráttar heldur en íbúðamarkaður sem náði viðsnúningi strax árið 2010, að því er segir í Morgunkorninu.