"Galið að láta veiðigjaldið bitna á sjómönnum"

Framkvæmdastjóri Sjómannasambands Íslands segir að það komi ekki til greina að sjómenn taki á sig hluta veiðigjaldsins sem samþykkt var á Alþingi síðasta vor. Sjómenn og útgerðarmenn eiga nú í kjaradeilu og útgerðin fer fram á að sjómenn taki á sig launaskerðingu vegna veiðigjaldanna sem voru samþykkt á Alþingi í vor.

„Mér finnst alveg galið að ætla að taka þetta af sjómönnum," segir Hólmgeir Jónsson, framkvæmdastjóri Sjómannasambands Íslands. „Ef maður skoðar hver var vilji löggjafans þegar veiðigjaldið var samþykkt er alveg skýrt að gjaldið er tekið af umframhagnaði útgerðarinnar." Honum finnst mjög undarlegt að það þurfi að lækka laun starfsfólks ef að umframhagnaður útgerðarinnar minnkar.

Kjarasamningar sjómanna losnuðu í byrjun árs 2011. Þá vildu fulltrúar LÍU ekki semja um kjör sjómanna fyrr en málin varðandi stjórn fiskveiða væru komin á hreint á Alþingi. Í vor var kjaradeilunni vísað til Ríkissáttasemjara og í næstu viku munu deiluaðilar funda. Að sögn Sævars Gunnarssonar, formanns Sjómannasambands Íslands, er himinn og haf milli deiluaðila og margs konar ágreiningur sem þarf að leysa. Fjallað var um málið í Morgunblaðinu í dag.