Samningaviðræður um dýrasta hótel landsins langt komnar

Samningaviðræður við forsvarsmenn svissnesks fjárfestingafélags um byggingu hótelbyggingar við tónlistar- og ráðstefnuhúsið Hörpu eru langt komnar, en Marriot-hótelið sem rísa mun á svæðinu, verður langdýrasta hótel landsins.

Hótelið sem rísa á hér við Hörpuna og taka mun til starfa árið 2015, verður allt hið glæsilegasta, en það verður búið um 270 hágæðaherbergjum, auk margvíslegrar úrsvalsþjónustu. Gert er ráð fyrir að fjárfestingin verði upp á um 60 milljónir evra með lóðaverðinu, eða sem nemur tæplega tíu milljörðum króna.

Til samanburðar má nefna að virði hússins sem hýsir Hilton Reykjavík Nordica Hótel er um þrír og hálfur milljarður króna með lóðinni.

Upphaflega var ráð fyrir því gert að samningaviðræður milli svissneska fjárfestingafélagsins World Leisure Investment og Sítusar, dótturfélags Austurhafnar eiganda Hörpunnar og lóðréttinda í grennd, myndi ljúka í apríl sl. Það hefur hins vegar ekki gengið eftir en að sögn Péturs J. Eiríkssonar, stjórnarformanns Austurhafnar, hafa samningaviðræður staðið yfir síðustu daga og vikur og gengið vel. Vonir standa til þess að viðræðunum ljúki á næstunni með samningum.

Bandaríska hótelkeðjan Marriot mun reka hótelið undir sínu nafni en það verður í hið minnsta fjögurra stjörnu. Húsið sjálft verður í eigu hins svissneska félags, sem átti hæsta boð í lóðina við hlið Hörpunnar, upp á liðlega 1,8 milljarða króna. Endanlegar teikningar af útliti hússins liggja ekki fyrir enn, að sögn Péturs, en ljóst má vera að það mun setja afar sterkan svip á miðborg Reykjavíkur þegar það verður upprisið og ferðamenn, innlendir sem erlendir, farnir að glæða það lífi.