Hluti eigenda Kísilfélagsins keypti Helguvíkurlóðina

Hluti eigenda Íslenska kísilfélagsins hefur fest kaup á lóð við Helguvík í Reykjanesbæ þar sem áætlað er að reisa kísilver. Um er að ræða sömu lóð og Íslenska kísilfélagið hafði fyrirhugað að nýta undir kísilver áður en Reykjaneshöfn rifti kaupsamningi þess efnis.

Í tilkynningu frá Reykjaneshöfn til Kauphallar Íslands í síðustu viku segir að kaupandinn, félagið Stakksbraut 9 ehf., hafi greitt 200 milljónir samkvæmt samningi.

Stakksbraut 9 var stofnað í febrúar síðastliðnum af lögmannastofunni BBA Legal og eini stjórnarmaður þess er Atli Björn Þorbjörnsson, einn eigenda BBA Legal.

Í samtali við Markaðinn sagðist Atli Björn ekki geta veitt upplýsingar um það hverjir stæðu að félaginu, en heimildir Markaðarins herma að um sé að ræða aðstandendur Tomahawk Development á Íslandi, sem áttu 80% hlut í Íslenska kísilfélaginu á móti bandaríska félaginu Globe Specialty Metal.

Reykjaneshöfn rifti samningum við Íslenska kísilfélagið hinn 18. apríl, vegna vanefnda á samningum, en sama dag var gengið frá kaupum Stakksbrautar 9 ehf. á lóðinni, sem er að Stakksbraut 9. Þá samninga taldi Reykjaneshöfn ekki lakari en samningana við Íslenska kísilfélagið.

- þj