Lánasamningurinn undirritaður

Fjármála- og efnahagsráðherra undirritaði í dag fyrir hönd ríkisins lánasamning við Vaðlaheiðargöng hf. vegna framkvæmdar við jarðgöng undir Vaðlaheiði. Upphæð lánsins er 8,7 milljarðar króna og með undirrituninni er fjármögnun verkefnisins tryggð.

Samkvæmt áætlunum mun lánið fást endurgreitt á næstu 28 árum með veggjöldum en menn hafa deilt um hvort þær áætlanir séu raunhæfar.

Lánið er veitt á grundvelli laga nr. 48/2012 um heimild til handa ráðherra f.h. ríkissjóðs til að fjármagna gerð jarðganga undir Vaðlaheiði og með samþykki Ríkisábyrgðasjóðs.