Björgólfur Thor ætlar að taka þátt

Novator, fjárfestingafélag í eigu Björgólfs Thors Björgólfssonar, ætlar að kaupa breytileg skuldabréf og/eða taka þátt í fyrirhugaðri hlutafjáraukningu sem tölvuleikjaframleiðandinn CCP hyggst ráðast í á næstunni, samþykki aðalfundur félagsins áætlunina. Alls vill stjórn CCP fá heimild til að taka skuldabréfalán upp á allt að 20 milljónum dala, jafnvirði um 2,6 milljarða króna, til fimm ára. Þá sækist stjórnin einnig eftir því að fá heimild til að hækka hlutafé um allt að 625 þúsund krónur að nafnvirði með útgáfu nýrra hluta í tengslum við skuldabréfalánið. Aðalfundurinn verður haldinn 12. júní næstkomandi.

Novator er stærsti einstaki eigandi CCP með 30,4 prósenta eignarhlut. Markaðurinn beindi fyrirspurn til Novators um hvort félagið myndi taka þátt í ofangreindri fjármögnun. Í svari Ragnhildar Sverrisdóttur, talsmanns Novators, kemur fram að „afstaða Novators er sú að félagið hefur áhuga á að taka þátt í þessari fjármögnun og styðja við félagið, hér eftir sem hingað til“. - þsj