Minna úrval vegna merkinga matvara

Hagar hafa að mestu leyti skipt út matvælum sem þarf að merkja vegna reglugerðar um merkingar á erfðabreyttum matvælum sem tók gildi um áramótin, að sögn Finns Árnasonar forstjóra.

„Við höfum farið í það að skipta út stærstum hluta. Ég held að það sé algjör undantekning að við séum með vörur sem þarf að merkja. Ég er þeirrar skoðunar að þegar fram í sækir flytjist ákveðin viðskipti til Evrópu þar sem minna er um þetta innihald. Þar eru vörurnar auk þess merktar og ekki þarf að endurmerkja þær hér.“

Það er mat Finns að ákveðnar vörur muni detta út af markaðnum hér. „Sumir framleiðendur vilja ekki að þessar merkingar séu settar á vörur þeirra. Jafnframt ríkir óvissa um sumar vörutegundir þar sem margir framleiðendur, sérstaklega í Bandaríkjunum, vilja ekki staðfesta hvort þær innihaldi erfðabreytt efni.“

Ekki þarf að merkja morgunkornstegundirnar frá General Mills, Cheerios, Cocoa Puffs og Honey Nut Cheerios sem fluttar verða inn á þessu ári, sem erfðabreytt matvæli, að því er Ari Fenger, framkvæmdastjóri Nathan& Olsen, greinir frá.

Að sögn Ara verður Nathan & Olsen ekki með neinar vörur sem þarf að merkja.

Spurður hvort fyrirtækið hafi verið með til sölu erfðabreytt matvæli segir hann: „Ég vil ekki tala um erfðabreytt. Við uppfyllum bara kröfur yfirvalda.“

En eru Cheerios og Cocoa Puffs sem eru í hillum verslana nú erfðabreytt matvæli?

„Ég get ekki svarað því. Við uppfylltum reglugerðir árið 2011 og munum gera það 2012.“

Ari bætir því við að gamla, góða, gula Cheeriosið, eins og hann orðar það, verði áfram til sölu á Íslandi með sama góða bragðinu. Það verði áfram flutt inn frá Bandaríkjunum.

„Við höfum hins vegar lagað Cocoa Puffs og Honey Nut Cheerios að óskum neytenda og minnkað sykurmagn og annað í því. Það er ný uppskrift í þeim pökkum.“

Markmiðið með reglugerðinni um merkingar erfðabreyttra matvæla sem tók gildi um áramótin er að neytendur fái réttar upplýsingar um þau erfðabreyttu matvæli sem eru til sölu.

ibs@frettabladid.is