Sótti áður um starf hjá Norðurorku - fékk ekki vegna glæparannsóknar

„Þessi maður kom einnig til greina þegar hann sótti um starf forstjóra hjá Norðurorku í fyrra. Þá var ákveðið að hann yrði ekki ráðinn þar sem hann var álitinn sakborningur af sérstökum saksóknara," segir Edward Huijbens, varabæjarfulltrúi VG á Akureyri og stjórnarmaður Norðurorku. Hann gagnrýnir ráðningu Þorvalds Lúðvíks Sigurjónssonar sem framkvæmdastjóra Atvinnuþróunarfélags Eyjafjarðar (AFE), en hann falaðist eftir forstjórastöðu hjá Norðurorku, sem tilheyrir Akureyrarbæ, á síðasta ári.

Tilkynnt var um ráðningu Þorvalds Lúðvíks á mánudaginn síðasta. Í tilkynningu á vef AEF segir orðrétt:

„Vegna fyrri starfa sinna hjá Saga Fjárfestingarbanka og sem framkvæmdastjóri hjá Kaupþingi til ársins 2006 hefur Þorvaldur Lúðvík aðstoðað Sérstakan Saksóknara í rannsóknum embættisins á málefnum Glitnis og Kaupþings. Stjórn AFE hefur kynnt sér þau mál og þykir ekki ástæða til að efast um hæfi hans vegna þeirra rannsókna."

Fram kemur í hádegisfréttum RÚV að stjórnin hefði aldrei kannað sjálf hvort það væri rétt sem Þorvaldur sagði, það er að segja, hvort hann væri að aðstoða við rannsókn málsins, eða hvort hann hefði stöðu grunaðs manns.

Málin sem eru til rannsóknar tengjast annars vegar sölu Saga Capital, þar sem Þorvaldur var forstjóri, á skuldabréfi fyrirtækisins Stíms, en Glitnir hafði milligöngu um söluna. Hitt snýst um meint brot í Kaupþingi á árunum 2007 og 2008, en Þorvaldur lét af störfum í Kaupþingi árið 2006.

Edward segir í samtali við Vísi að Geir Kristinn Aðalsteinsson, formaður stjórnar AEF, hafi verið ljóst að Þorvaldur hafi verið grunaður maður, enda sat hann í stjórn Norðurorku þegar til stóð að ráða hann í vinnu. Þá var tekin sú ákvörðun að slíkt væri ekki boðlegt vegna stöðu Þorvaldar hjá sérstökum saksóknara.

„Svo verður líka trúnaðarbrestur á mettíma þegar Þorvaldur heldur því fram að hann hafi eingöngu aðstoðað við rannsóknina, en væri ekki grunaður maður," segir Edward og bætir við að réttast væri að nýráðinn framkvæmdastjórinn segði upp vegna trúnaðarbrestsins.

„Svo er alveg klárt mál að Geir Kristinn þarf að íhuga sína stöðu vandlega í ljósi aðstæðna," segir Edward.

Ekki náðist í Geir Kristinn við gerð fréttarinnar.