Leiðréttir og afskrifar lán hjá Olís og tengdum félögum

Samkomulag hefur tekist við Landsbankann um fjárhagslega endurskipulagningu Olíuverzlunar Íslands hf (Olís) og tengdra félaga.

Í tilkynningu frá Olís segir að samkomulagið feli í sér að Landsbankinn leiðrétti og niðurfærir hluta af lánum félaganna meðal annars í samræmi við þegar kunnar niðurstöðu dómsmála um ólögleg gengistryggð lán og að eftirstandandi lán félagsins eru endurskipulögð.

„Samkomulagið er endanlegt, þótt ekki liggi fyrir dómsniðurstaða, um allar tegundir gengistryggðra lána til félaganna. Af þeim sökum er ekki hægt á þessari stundu að leggja á það mat, hve stór hluti niðurfærslunnar er vegna leiðréttinga gengistryggðra lána og hve mikið eftirgjöf bankans.

Samkomulagið felur ennfremur í sér, að núverandi hluthafar afli félaginu viðbótar hlutafjár og er samkomulagið þegar að fullu fjármagnað. Hlutafjáraukningin er háð samþykki Samkeppniseftirlitsins. Ekki mun liggja fyrir fyrr en eftir nokkrar vikur hvernig endanlegur hluthafahópur mun verða samsettur," segir ennfremur í tilkynningunni.