Veltan á fasteignamarkaðinum eykst töluvert

Fjöldi þinglýstra kaupsamninga á höfuðborgarsvæðinu í síðustu viku var 93. Þetta er nokkru meira en nemur vikumeðaltalinu undanfarna þrjá mánuði sem er 86 samningar.

Þetta kemur fram á vefsíðu Þjóðskrár Íslands. Þar segir að af þessum 93 samningum voru 63 samningar um eignir í fjölbýli, 21 samningur um sérbýli og 9 samningar um annars konar eignir en íbúðarhúsnæði.

Heildarveltan var 3.5 milljarðar króna og meðalupphæð á samning 37,9 milljónir króna. Veltan er langt yfir meðaltalinu síðustu þrjá mánuði sem er tæplega 2,7 milljarða kr. á viku. Sama er að segja um meðalupphæðina en hún er rúmlega 31 milljón á viku undanfarna þrjá mánuði.