Húsasmiðjan verður formlega hluti af Bygma á morgun

Húsasmiðjan verður formlega hluti af dönsku byggingavörukeðjunni Bygma, frá og með morgundeginum. Í tilkynningu frá fyrirtækinu segir Peter Christiansen eigandi og stjórnarformaður Bygma að spennandi tímar séu framundan.

„Við erum sannfærð um að íslenskur byggingavörumarkaður mun taka við sér á næstunni og höfum trú á að Húsasmiðjan muni halda áfram að vera leiðandi á íslenskum byggingavörumarkaði. Rekstur Húsasmiðjunnar hefur snúist til hins betra á síðustu tveimur árum og við hlökkum til að gera enn betur. Það eru spennandi tímar framundan fyrir íslenska neytendur," segir Christiansen.

Sigurður Arnar Sigurðsson, forstjóri Húsasmiðjunnar segir að kaup dönsku keðjunnar marki nýtt upphaf fyrir starfsfólk og viðskiptavini Húsasmiðjunnar. „Með sterkan bakhjarl eins og Bygma erum við betur í stakk búin til að mæta aukinni samkeppni á byggingavörumarkaði," segir Sigurður og bætir við að framtíðin sé björt. „Við höldum áfram að byggja upp með Íslendingum eins og við höfum gert síðan 1956, af meiri krafti en nokkru sinni fyrr."