Lífeyrissjóðirnir lánuðu Glitni 11 milljarða

Þrettán lífeyrissjóðir veittu Glitni nærri ellefu milljarða króna lán í mars 2008 þegar viðvörunarmerki voru farin að blikka á íslenskum fjármálamarkaði. Engar tryggingar voru fyrir láninu og enginn gjalddagi. Milljarðarnir töpuðust nokkrum mánuðum síðar þegar bankinn féll.

Fréttastofan ræddi við sérfræðing með áratuga reynslu úr íslensku fjármálalífi - hann kannaðist ekki við að hafa séð ákvæði sem þetta áður - þ.e. að útgefanda skuldabréfs, Glitni, sé samkvæmt samningi heimilt að færa niður höfuðstól til að mæta hugsanlegu rekstrartapi bankans.

Lífeyrissjóðirnir þrettán hafa höfðað mál á hendur slitastjórn Glitnis og telja sig hafa meðal annars verið beitta blekkingum af stjórnendum bankans.

Þessi tiltekna fjárfesting var ítarlega rædd í fjárfestingaráði LSR áður en ákvörðun var tekin. Haukur Hafsteinsson, framkvæmdastjóri LSR, baðst undan viðtali í dag en svaraði fúslega spurningum fréttastofu. Hann segir tryggingu sjóðsins hafa falist í kröfu á bankann við gjaldþrot þar sem svona skuldabréf gangi framar til dæmis hlutabréfum. Sum sé að lán sem þetta hafi verið áhættuminni fjárfesting en að kaupa hlut í bankanum. Haukur segir sjóðinn hafa verið blekktann, bankinn hafi reitt fram rangar upplýsingar um eiginfjárstöðu, lausafjárstöðu og stærstu áhættuskuldbindingar Glitnis þegar LSR tók ákvörðun um þessa milljarða fjárfestingu sem varð að engu áður en búið var að greiða eina einustu krónu í vexti, hvað þá meir.