Fullnaðarsigur fyrir rétti í Dubai

Stjórnarformaður íslenska snekkjusmíðafyrirtækisins Scandic International var í gær sýknaður af ákærum í máli á hendur honum sem höfðað var í Dubai í Sameinuðu arabísku furstadæmunum.

Forsaga málsins er sú að fyrirtækið hafði unnið mál í Abu Dhabi þar sem ekki hafði verið staðið við greiðslur vegna smíði á snekkju.

Kaupandi snekkjunnar sem tapað hafði málinu höfðaði þá á móti mál í Dubai þar sem Benedikt G. Benediktsson, stjórnarformaður Scandic, var sakaður um skjalafals. Greint var frá því á Vísi að Benedikt hefði setið um tíma í gæsluvarðhaldi ytra vegna málsins, en hafi verið látinn laus gegn greiðslu 1,7 milljóna króna tryggingargjalds.

Dómstóll í Dubai komst svo í gær að þeirri niðurstöðu að ekki væru nægar sannanir í málinu á hendur Benedikt.

„Fallegur, íslenskur fullnaðarsigur í rétti dagsins,“ sagði Benedikt eftir að niðurstaðan lá ljós fyrir, en í umfjöllun Gulfnews.com er því lýst hvernig bros færðist yfir andlit hans þegar dómurinn var kveðinn upp.

Benedikt sagði að þótt dómurinn hefði reyndar varla getað farið á annan veg hefði verið gott að koma málinu frá.

Samkvæmt frétt Gulfnews.com er hægt að áfrýja dómnum innan fimmtán daga.