Eigum heimsmet í notkun mjaltaþjóna

Hlutfall mjólkur sem kemur frá mjaltaþjónabúum nemur 28,2% af heildarframleiðslu landsins sem er hæsta hlutfall mjaltaþjónamjólkur í heimi árið 2011 samkvæmt NMSM eða Samtökum norrænna afurðastöðva í mjólkuriðnaði.

Fjallað er um málið á vefsíðu Landssambands kúabænda. Þar segir að um síðustu áramót voru 101 kúabú með mjaltaþjóna hér á landi og sum þeirra með fleiri en einn mjaltaþjón enda er heildarfjöldi mjaltaþjóna á landinu öllu 120. Afurðastöðvar landsins tóku alls á móti 35,2 milljónum lítrum frá þessum kúabúum í fyrra.

Fyrra metið var sett árið 2010 þegar dönsk kúabú með mjaltaþjóna skiluðu 26,9% heildarmagns mjólkur þar í landi.