Hundurinn hafði áður drepið

Eigandi læðunnar kærði í gær eiganda hundsins Birnu til lögreglu en þessi sama tík réðist á og drap kött í Dofraborgum í Grafarvogi fyrir um árið. Það atvik var einnig kært til lögreglu en endaði með dómssátt. Í samtali við fréttastofu í dag sagði nágranni,  sem varð vitni að þeirri árás, hundana hafa ógnað bæði eiganda kattarins og þeim sem komu honum til hjálpar.

Tíkin Birna býr hjá fjölskyldu í Grafarvogi en hún er ekki eini Husky-hundurinn á heimilinu því þar eru fimm slíkir hundar til viðbótar auk kattar. Á sunnudaginn slapp Birna og annar hundur út fyrir slysni.

Í skýrslu lögreglunnar kemur fram að hundarnir tveir hafi farið hálfir ofan í barnavagn í nágrenninu en konan sem var úti að labba með vanginn hefur þó staðfest að það eigi ekki við rök að styðjast.

„Þetta er úti hött að heyra þetta,“ sagði Ásdís Kristjánsdóttir, dóttir skráðs eiganda tíkarinnar Birnu. „Þetta eru rosalega góðir hundar. En er þessi tegund hættulegri en önnur hundategund? Alls ekki, þetta eru bara hundar - ekki úlfar eins og sumir halda."

„Þeir eru alltaf inni - þeir komast ekki í burtu - nema í þetta eina sinn. Við erum núna komin með lás á hliðið sem opnaðist og þetta er ekki að fara að gerast aftur og við vonumst til þess að Hundaeftirlitið láti ekki lóga tíkinni því hún er alveg rosalega góð,“ sagði Ásdís.

Hundaeftirlit Reykjavíkur krefst þess að hundurinn fari í skapgerðarmat en ekki hefur verið tekin ákvörðun um aflífun. Mikið hefur verið rætt um málið á netinu og margir farið misljótum orðum um hundana.

„Æi þetta er rosalega harkalegt hvernig þeir tala um þetta," sagði Ásdís klökk.