Skuldabréf fyrirtækja er vannýttur fjárfestingakostur

Vannýtt tækifæri eru falin í útgáfu skuldabréfa íslenskra fyrirtækja. Skuldabréfaútgáfan myndi leysa fjármögnunarvanda fyrirtækja og vandamál fjárfesta sem skapast af gjaldeyrishöftunum. Þetta kemur fram í grein sem Haraldur I. Þórðarson, framkvæmdastjóri Markaðsviðskipta Straums fjárfestingabanka hf., skrifaði í Viðskiptablaðið í dag.

Frá hruni hefur varla verið nokkuð um skuldabréfaútgáfu íslenskra fyrirtækja. Það má einkum rekja til þess að eigendur skuldabréfa frá fyrirtækjum komu illa út úr hruninu og því hafa fjárfestar verið spenntari fyrir ríkisskuldabréfum.

Vegna gjaldeyrishaftanna geta fjárfestar ekki fjárfest utan landsteinanna. Þetta skapar lausafjárbólu og leiðir til virðisskekkju á landinu, t.d. í fasteignum og ríkisskuldabréfum. Af þessu leiðir að eignasöfn fjárfesta verða minna dreifð með hverjum deginum.

Þetta ástand veitir fyrirtækjum kjörið tækifæri til að gefa út skuldabréf til að fjármagna sig að mati Haraldar enda skapi það nýjan fjárfestingarkost fyrir fjárfesta. Hann segir þó mikilvægt að skilmálar skuldabréfanna séu sambærileg við aðrar lántökur fyrirtækja þannig að allir lánveitendur sitji við sama borð.

Viðskiptablaðið sagði einnig frá því í dag að Eik fasteignafélag ætlar að leggja í skuldabréfaútgáfu fyrir 11,6 milljarða króna. Félagið hyggst selja skuldabréfin á næsta mánuði.