Heldur dró úr útlánum ÍLS milli ára í janúar

Heildarútlán Íbúðalánasjóðs (ÍLS) námu tæpum 1,3 milljörðum króna í janúar en þar af var rúmur 1,1 milljarður króna vegna almennra lána. Til samanburðar námu almenn útlán í janúar í fyrra tæpum 1,4 milljörðum króna. Meðalútlán almennra lána voru um 9,2 milljónir króna í janúar.

Þetta kemur fram í mánaðarskýrslu sjóðsins. Þar segir að heildarvelta íbúðabréfa nam um 88 milljörðum króna í janúar samanborið við um 50 milljarða í desember 2011.

Samtals nam velta íbúða-, hús- og húsnæðisbréfa í Kauphöllinni í janúar um 104 milljörðum króna sem er 34% af heildarveltu með skuldabréf. Markaðsvirði þessara skuldabréfa er um 37% af heildarmarkaðsvirði skráðra skuldabréfa í Kauphöllinni.

Greiðslur Íbúðalánasjóðs vegna húsnæðisbréfa og annarra skuldbindinga námu tæpum 2,3 milljörðum króna í janúar. Uppgreiðslur í janúar námu um 1,4 milljörðum króna.