Upplýsingatæknibúskapur Neyðarlínunnar hjá Nýherja

Neyðarlínan hefur samið við Nýherja um rekstur á upplýsingatæknibúskap sínum samkvæmt tilkynningu frá Nýherja. Samningurinn felur í sér rekstur á netkerfum, netþjónum, símkerfi og notendaþjónustu á tölvubúnaði fyrir alla starfsmenn Neyðarlínunnar.

Þá var samið um ábyrgðarþjónustu á IBM netþjónum, Cisco netbúnaði, APC varaaflgjöfum og Avaya símkerfi sem tryggir Neyðarlínunni aðgang að færustu sérfræðingum viðkomandi birgja ásamt tryggu aðgengi að varahlutum.

Innifalið í samningi er ráðgjöf helstu sérfræðinga Nýherja til stefnumörkunar til að tryggja ávallt sem best rekstraröryggi og ná fram hámarks hagkvæmni í rekstri upplýsingatæknikerfa Neyðarlínunnar.

„Nýherji hefur um margra ára skeið verið eitt af leiðandi upplýsingatæknifyrirtækjum landsins og hefur yfir að ráða öflugum samstarfsaðilum erlendis, sem skipti miklu máli afhverju við ákváðum að velja Nýherja til þess að annast rekstur á kerfum okkar," segir Tómas Gíslason aðstoðarframkvæmdastjóri Neyðarlínunnar.

„Það er afar ánægjulegt jafn öflugur aðili og Neyðarlínan, sem reiðir sig umfram allt á öryggi og hámarksupptíma á kerfum sínum, skyldi velja Nýherja til þess að annast rekstur á upplýsingatækniumhverfi sínu. Nýherji hefur áratuga reynslu á slíkum rekstri og starfar eftir skýrum og vottuðum ferlum. Enda eru sífellt fleiri fyrirtæki sem treysta alfarið á okkur um að tryggja hágæða þjónustu á upplýsingatæknikerfum sínum," segir Gunnar Zoéga, framkvæmdastjóri Tæknisviðs Nýherja.

Neyðarlínan er leiðandi þjónustufyrirtæki á sviði neyðar- og öryggisþjónustu, samræmir viðbrögð og boðar björgunar- og neyðarsveitir á öllu landinu og er tengiliður milli landsmanna og viðbragðsaðila.