Greining spáir 25 punkta hækkun

Greining Íslandsbanka spáir því að peningastefnunefnd Seðlabankans ákveði að hækka stýrivexti bankans um 0,25 prósentur á næsta vaxtaákvörðunardegi bankans sem er 16. maí. Verða daglánavextir bankans þá 6,25%, vextir af lánum gegn veði til sjö daga 5,25%, hámarksvextir á 28 daga innistæðubréfum 5,0% og innlánsvextir 4,25%.

Greining Íslandsbanka segir að frá síðustu vaxtaákvörðun bankans hafi verðbólgan reynst þrálátari en reiknað var með í spá Seðlabankans. Tvær nýjar verðbólgumælingar hafi verið birtar á tímabilinu og verðbólgan farið úr 6,3% upp í 6,4%. Verðbólgan á fyrsta fjórðungi ársins hafi verið 6,4% en í síðustu spá Seðlabankans sem birt var í febrúar síðastliðinn hafi verið reiknað með að verðbólgan yrði 6,1% á fjórðungnum. Þá hafi undirliggjandi verðbólga einnig færst í aukanna, en árleg kjarnaverðbólga 3 (mæld verðbólga að undanskildum áhrifum sveiflukenndra liða svo sem matvöru, bensíns, opinberrar þjónustu og raunvaxta á húsnæðislánum) mældist 6,0% í mars en stóð í 5,8% við síðasta vaxtaákvörðunarfund.

Greining reiknar með því að peningastefnunefnd bankans ákveði að hækka stýrivexti sína aftur um 0,25 prósentur á vaxtaákvörðunarfundi sínum 13. júní næstkomandi. Stýrivextir verði komnir i 5,75% undir lok árs.