Farþegum Icelandair fjölgaði um 18% milli ára í febrúar

Farþegum Icelandair fjölgaði um 18% á milli ára í febrúar og voru þeir tæplega 94 þúsund í mánuðinum.

Sætanýting nam 75%, sem er 4,2 prósentustigum betri en í febrúar á síðasta ári þegar hún var 70,8%.

Þetta kemur fram í tilkynningu frá félaginu. Þar segir að fjöldi farþega hjá Flugfélagi Íslands jókst um 7% á milli ára í febrúar og var alls um 27 þúsund. Sætanýting nam 71,1% og lækkaði um 0,4 prósentustig á milli ára. Fraktflutningar jukust um 25% á milli ára.

Framboð á gistinóttum hjá Flugleiðahótelunum jókst um 16% á milli ára. Herbergjanýting var 69,8%, eða 15,5 prósentustigum hærri en í febrúar í fyrra.