Lýður Guðmundsson fyrir dómi

Þeir Lýður Guðmundsson, oftast kenndur við Bakkavör, og Bjarnfreður Ólafsson hæstaréttarlögmaður voru mættir fyrir dómara í Héraðsdómi Reykjavíkur í dag þegar fyrirtaka fór fram í máli sérstaks saksóknara gegn þeim.

Í ákærunni er Lýð gefið að sök að hafa greitt minna en nafnverð fyrir nýtt hlutafé í Exista í desember árið 2008. Nafnvirði hlutanna var 50 milljarðar króna, en einn milljarður króna var lagður fram fyrir hlutina. Í ákærunni segir að milljarðurinn hafi í raun komið frá Lýsingu, sem var í eigu Exista, í formi láns. Upphæðin hafi aftur á móti aldrei runnið inn í rekstur Exista.

Lýður og Bjarnfreður Ólafsson eru í ákærunni sakaðir um að hafa vísvitandi skýrt rangt og villandi frá hækkun á hlutafé Exista þegar send var tilkynning til hlutafélagaskrár vegna viðskiptanna.

Verjendur sakborninga skiluðu greinargerðum og því næst var málinu frestað fram yfir áramót.