Tíu starfsmönnum Hyrnunnar í Borgarnesi sagt upp

Tíu starfsmenn Samkaupa í Hyrnunni í Borgarnesi fengu uppsagnarbréf í síðustu viku. Frá þessu er greint á vefsíðu Skessuhorns. Ómar Valdimarsson, framkvæmdastjóri Samkaupa sem rekið hefur Hyrnuna, segir að þetta sé gert vegna þess að leigusamningur Samkaupa við húseigendur, N1, er að renna út um næstu áramót.

„Það er fullur vilji hjá okkur í Samkaupum að reka Hyrnuna áfram en því miður hefur ekki náðst samkomulag við N1. Þá hefur heldur ekki náðst samkomulag hvernig yfirtaka þeirra á Hyrnunni verður háttað. Við hörmum mjög að þurfa að grípa til þessa ráðs og það er óþægilegt að starfsfólkið okkar þurfi að vera í þessari óvissu. Okkur var þetta nauðugur kostur," segir Ómar í viðtali við Skessuhorn.

Sigurður Guðmundsson, rekstrarstjóri Hyrnunnar er meðal þeirra sem var sagt upp störfum. Hann segir þá sem nú fengu uppsagnarbréf vera með lengstan starfsaldur og þar af leiðandi lengstan uppsagnarfrest.

Að sögn Ómars er gert ráð fyrir að allir ráðningasamningar Samkaupa verði lausir á haustmánuðum október og nóvember. Aðspurður hvers vegna samningar við starfsfólk renni út í október en ekki í lok árs líkt og leigusamningurinn segir Ómar í samtali við Skessuhorn, að það tengist því að ekki hafi náðst samninga við N1. „Enn hafa ekki náðst samningar við N1 um yfirtöku þeirra á rekstrinum og þess vegna gerum við ráð fyrir að þurfa að skila húsinu eins og við tókum við því. Því þurfum við tíma til að taka niður innréttingar og koma húsinu í samt horf. Því má gera ráð fyrir að rof verði á rekstri Hyrnunnar á síðustu mánuðum ársins."

Samkaup hafa rekið Hyrnuna frá árinu 2004 en forverar þeirra opnuðu Hyrnuna í júní 1991.

Sjá má fréttina á vef Skessuhorns hér.