Segir alrangt að almenningur niðurgreiði gagnaver

BBI skrifar 2. júlí 2012 17:13

Ómar Benediktsson, forstjóri Farice ehf., hafnar því með öllu að almenningur niðurgreiði þjónustu Farice við gagnaver. Jóhannes Gunnarsson, formaður Neytendasamtakanna, sagði aftur á móti aðspurður í samtali við Vísi í dag líta svo á að svo væri.

Ómar bendir á að kostnaðurinn við lagningu sæstrengja til landsins sé gífurlegur. „Ef almenningur í landinu þyrfti að greiða fyrir alla þá fjárfestingu sem lagt hefur verið í til að halda uppi fjarskiptasambandi við útlönd þá mundi kostnaður vera margfaldur á við það sem greitt er fyrir í dag," segir Ómar.

Hann segir að þó gagnaverin fái þjónustu á lægra verði en íslensk símafyrirtæki muni það leiða til lægri kostnaðar fyrir neytendur þar sem fleiri koma þá að heildarfjárfestingunni sem nemur yfir 20 milljörðum.

Hann segir mikilvægt fyrir landið að tveir sæstrengir liggi hingað.

Hann segir einnig rangt að Farice ehf. sé að þrefalda verðskrá sína. „Verðskrá Farice var stórlækkuð 2009 í kjölfar hrunsins og er nú verið að taka einungis hluta af þeirri lækkun til baka. Jafnvel þó verðskráin tvöfaldist nú þá þýðir það ekki að öll hækkunin fari út í verðlagið þar sem nú er gefinn möguleiki á magnafsláttum sem var ekki í fyrri verðskrá," segir Ómar, en um þann afslátt á eftir að semja.

Tengdar fréttir

Gagnaver fá þjónustuna ódýrari en almenningur

Íslenskur almenningur mun þurfa að greiða umtalsvert meira en alþjóðleg gagnaver fyrir internettengingu við útlönd verði áform Farice ehf. að veruleika. Fréttastofa greindi frá því á föstudag að Farice ehf., sem rekur tvo stærstu sæstrengina sem tengja Ísland við umheiminn, stefni á að rukka Símann og Vodafone næstum þrefalt meira fyrir þjónustu sína frá og með október.

2. júlí 2012 10:26

Stefnir í umtalsverða verðhækkun á internetþjónustu

Farice ehf. hefur boðað næstum þrefalda verðhækkun á þjónustu sinni, en fyrirtækið heldur úti tveimur af þremur sæstrengjum sem tengja Ísland við umheiminn. Núgildandi samningur fyrirtækisins við Símann og Vodafone rennur út í október. Eftir þann tíma fer fyrirtækið fram á téða verðhækkun.

29. júní 2012 20:08

"Ríkið að láta almenning niðurgreiða gagnaver“

Í rauninni er ríkið að láta almenning niðurgreiða gagnaver á Íslandi með því að Farice ehf. fari fram á nær þrefalda verðhækkun á þjónustu sinni við símafyrirtækin. Þetta segir Jóhannes Gunnarsson, formaður Neytendasamtakanna aðspurður um málið. „Það er alveg ljóst."

2. júlí 2012 12:46

Mest lesið

Fleiri fréttir