Mátti greiða 10 milljarða fyrir að láta Kaupþingsmál niður falla

Efnahagsbrotadeild bresku lögreglunnar, Serious Fraud Office, bauðst til þess að láta rannsókn gegn Robert Tchenguiz niður falla gegn því skilyrði að hann myndi gefa 50 milljónir sterlingspunda til góðgerðastarfa. Upphæðin nemur um 10 milljörðum íslenskra króna.

Breska blaðið Daily Telegraph segir að leynilegar samningaviðræður um þetta hafi farið fram á milli bræðranna og lögreglunnar. Samningaviðræðurnar hafi ekki gengið vegna nokkurra ágreiningsefna. Meðal annars vegna þess að ekki hafi náðst samkomulag um það hvort gera ætti greiðslurnar opinberar eða ekki.

Rannsókn Serious Fraud Office á málum Tchenguizbræðra lýtur að viðskiptum þeirra við Kaupþing. Serious Fraud Office réðst í miklar húsleitir hjá bræðrunum vegna málsins og voru þeir handteknir. Bræðurnir hafa nú stefnt lögreglunni vegna þess og hefur hún verið harðlega gagnrýnd.