Leiðtogar AGS og ESB í hár saman út af Grikklandi

Leiðtogar Alþjóðagjaldeyrissjóðsins (AGS) og Evrópusambandsins (ESB) eru komnir í hár saman vegna niðurskurðarins í Grikklandi.

Skeytin ganga á milli þeirra í kjölfar þess að Christine Lagarde forstjóri Alþjóðagjaldeyrissjóðsins viðraði þá skoðun sýna í vikunni að Grikkir ættu að fá tvö ár í viðbót til að fást við niðurskurðar- og sparnaðaráætlanir sínar sem liggja til grundvallar neyðaraðstoðinni við landið.

Wolfgang Schäuble fjármálaráðherra Þýskalands tók þessi orð Lagarde óstinnt upp og gagnrýndi Lagarde harðlega í kjölfar þeirra. Sagði ráðherrann það óskynsamlegt að skipta um hest í miðju vaði.

Olli Rehn efnahagsmálastjóri Evrópusambandsins tekur undir með Schäuble og segir ekki gott fyrir sambandið að breyta snögglega stefnu sinni. Þá væru skoðanir AGS ekki lokaorðið þegar kæmi að málefnum Grikklands.

Lagarde lét skoðun sína á lengri frest til Grikklands í ljós í kjölfar nýrrar skýrslu frá Alþjóðagjaldeyrissjóðnum í vikunni þar sem fram kemur að mikill niðurskurður og sparnaður til að mæta skuldavanda geri yfirleitt illt verra og auki vandann. Í skýrslunni segir að skynsamlegra sé að auka vöxt með ýmsum aðgerðum samhliða því að dreifa niðurskurðinum yfir langt tímabil.