Hafnarfjörður semur við Íslandsbanka

Hafnarfjarðarbær og Íslandsbanki hafa undirritað samning um flutning bankaviðskipta sveitarfélagsins til Íslandsbanka.

Bankinn mun meðal annars hafa umsjón með innheimtu, greiðsluþjónustu og annarri almennri bankaþjónustu en auk þess mun hann aðstoða og hafa umsjón með endurfjármögnun sveitarfélagsins. Rekstur sveitarfélagsins hefur verið þungur frá efnahagshruninu haustið 2008, en mikill árangur hefur náðst í hagræðingu á þeim rúmu fjórum árum sem liðin eru.

Ársreikningur fyrir árið 2011 og árshlutareikningur ársins 2012 gefa til kynna að jafnvægi sé náð. Með aukinni framlegð og niðurgreiðslu skulda skapast rými til viðspyrnu sem leggur grunn að traustri framtíð bæjarins. Áfram er þó nauðsynlegt að gæta fyllsta aðhalds í rekstri, til að styrkja enn frekar þennan árangur.

Hafnarfjörður var áður í samstarfi við Arion banka.