Ummæli Hermanns benda til samkeppnislagabrota

Runólfur Ólafsson, framkvæmdastjóri Félags íslenskra bifreiðareigenda (FÍB), segir að ef ummæli Hermanns Guðmundssonar, fráfarandi forstjóra N1, séu sannleikanum samkvæm feli þau í sér brot á samkeppnislögum.

Hermann sagði í viðtali við Viðskiptablaðið sem kom út í dag að félagið N1 hafi lengi haft burði til að lækka eldsneytisverð á landinu en það hafi ekki verið gert því félaginu hafi borið „skylda til að virða ákveðið ástand sem var á markaðnum, þ.e. að félögin voru misvel sett."

„Ef menn eru farnir að haga sínum rekstri til þess að vera „næs" við samkeppnisaðilann þá eru þeir bara farnir að stýra markaðnum í samvinnu við hina. Olíusamráðið gekk út á það," segir Runólfur og veltir fyrir sér hvort Hermann sé að viðurkenna að olíusamráðið hafi aldrei tekið enda.

Reyndar finnst Runólfi eitthvað undarlegt við að N1 hafi haft meiri burði en aðrir til að lækka eldsneytisverð. „Það er nýbúið að afskrifa einhverja milljarða hjá félaginu," segir hann og finnst það benda til þess að félagið sé ekki sérlega burðugt.