Samkeppniseftirlitið mun skoða ummæli Hermanns

Páll Gunnar Pálsson, forstjóri Samkeppniseftirlitsins, segir að ummæli Hermanns Guðmundssonar, fráfarandi forstjóra N1, um að N1 hafi ekki lækkað eldsneytisverð af virðingu við slæma stöðu samkeppnisaðila sinna séu allrar athygli verð. „Samkeppniseftirlitið mun gaumgæfa hvort í þeim felist vísbendingar um samkeppnislagabrot," segir hann.

Hermann var í viðtali við Viðskiptablaðið í dag þar sem hann sagði orðrétt „Okkur bar skylda til þess að virða ákveðið ástand sem var á markaðnum, þ.e. að félögin voru misvel sett." Í viðtalinu má skilja Hermann svo að N1 hafi haft markaðsráðandi stöðu og til þess að hún yrði ekki misnotuð hafi verið ákveðið að lækka ekki verðið.

Páll segir að þetta þurfi að skoða sérstaklega, þ.e. hvort félagið hafi raunverulega haft markaðsráðandi stöðu og einnig hvort samkeppnislagabrot hafi verið framin með því að lækka ekki bensínverð.