Yfirlýsing frá Hermanni: Ummælin vísuðu til tímans frá bankahruni

Hermann Guðmundsson, fyrrverandi forstjóri N1, segir að með ummælum sínum í Viðskiptablaðinu í dag, um að auðvelt hefði verið fyrir fyrirtækið að valda einhverjum samkeppnisaðilanum skaða með verðstríði, hafi hann verið að vísa til tímabilsins frá bankahruni og að þeim tíma þegar fjárhagslegri endurskipulagningu þúsunda fyrirtækja lauk. Í dag hafi öll félögin burði til að stunda harða samkeppni.

Hermann sendi frá sér yfirlýsingu nú síðdegis. Þar segir hann meðal annars að hlutur smásala sé aðeins um 11 prósent og því sé ekki skýringa á háu eldsneytisverði að leita hjá þeim heldur sé skýringin miklar álögur hins opinbera.

Yfirlýsinguna má sjá í heild sinni hér að neðan.

Fjölmiðlar hafa í dag fjallað mikið um útsöluverð á eldsneyti vegna viðtals við undirritaðann í Viðskiptablaðinu í dag.

Það er frjáls álagning á eldsneyti og því ráðast útsöluverð á virkum markaði dag hvern. Þegar spurt er hvort útsöluverð gæti verið lægra þá hlýtur svarið að vera já eða nei.

Allan þann tíma sem undirritaður starfaði sem forstjóri Olíufélagsins og N1 hefur geysað hörð samkeppni á eldsneytismarkaði sem neytendur sjá alla daga í fjölmiðlum í formi tilboða, afslátta og tryggðarkerfa. Slíkir afslættir voru nánast óþekktir fyrir fáum árum. Verðbreytingar á útsöluverði eldsneytis hafa verið á bilinu 1-200 á ári þennan tíma sem einnig er skýrt merki um virka samkeppni um hylli neytenda.

N1 hefur alla tíð kappkostað að fylgja þeim lögum og reglum sem um starfsemi félagsins gilda og þá ekki síst samkeppnislögum í ljós sögunnar.

Vegna ummæla sem féllu um aðra smásala á eldsneyti skal tekið fram að þar var undirritaður að vísa til tímabilsins frá bankahruni og að þeim tíma þegar fjárhagslegri endurskipulagningu þeirra og þúsunda annara fyrirtækja lauk. Í dag hafa öll félögin burði til að stunda harða samkeppni.

Að lokum er rétt að benda á að hlutur smásala í eldsneytisverði er aðeins um 11% og því er ekki skýringa á háu eldsneytisverð að leita í álagningu smásala heldur er skýringin miklar álögur hins opinbera.

Virðingarfyllst

Hermann Guðmundsson

Fyrrv. forstjóri N1.