Höftin geta skapað bólur - eignaverð hækkar mikið hér

Gylfi Magnússson, dósent í viðskiptafræði, segir að mikilvægt sé að fylgjast grannt með gangi mála í íslensku efnahagslífi innan gjaldeyrishafta, því eignaverð geti hækkað mikið við þær aðstæður. Hann segir brýnt að horfa til þróunar eignaverðs þegar höftunum er aflétt.

Mikið vatn hefur runnið til sjávar frá því að bankakerfið hrundi fyrir tæpum fjórum árum og gjaldeyrishöftum var komið á. Fjármagn safnast upp í hagkerfinu þar sem höftin hindra fjárfestingu erlendis.

Hvort sem höftin eru áhrifavaldur eða ekki, þá er þróun á mörkuðum athygliverð. Þannig hefur ávöxtun á íslenskum hlutabréfamarkaði síðustu tvö ár, eftir algjört hrun árin 2007 og 2008, verið mjög góð í alþjóðlegum samanburði. Gengisvísitalan á íslenskum hlutabréfamarkaði hefur hækkað um 25 prósent síðustu tvö ár, á meðan meðaltalið á hinum Norðurlöndunum er 13 prósent. Víðast hvar í heiminum hefur ávöxtun hlutabréfa á sama tímabili verið neikvæð, enda óvissa í efnahagsmálum heimsins enn mikil.

Þá er fasteignaverð aftur tekið að hækka, eftir mikla raunlækkun eftir hrun, og velta í viðskiptum hefur aukist mikið á þessu ári miðað við árið á undan.

Gylfi Magnússon, dósent við viðskiptafræðideild Háskóla Íslands og fyrrum viðskiptaráðherra, segir brýnt við þær aðstæður sem hér eru, að fylgjast grannt með gangi mála.

„Ef eitthvað er þá leiða höftin til hærra fasteignaverðs og hlutabréfaverðs, einfaldlega vegna þess að það er ekki hægt að fjárfesta í útlöndum og þá leita krónurnar í annan farveg. Þetta er eitthvað sem þarf að hafa í huga þegar það er metið hversu hratt á að afnema höftin."