Aron sagði það að "taka snúning“ vera að "gera eitthvað“

Aron Karlsson, sem ákærður er fyrir fjársvik í tengslum við viðskipti með Skúlagötu 51 þar sem kínverska sendiráðið er til húsa, bar við minnisleysi um vegamikil atriði við aðalmeðferð málsins í morgun. Hann sagði Gísla Gíslason lögmann hafa séð um öll samskipti við banka fyrir sína hönd. Vitnað var til samskipta á Skype í dómsal í morgun þar sem Aron sagði m.a. við bróður sinn í samtali, að hann ætlaði sér að „taka snúning" á bönkunum.

Embætti sérstaks saksóknara ákærði Aron Karlsson, sem er sonur Karls Steingrímssonar sem gjarnan er kenndur við Pelsinn, 16. apríl á þessu ári, og fer aðalmeðferð í málinu fram í Héraðsdómi Reykjavíkur í dag.

Ákæran á hendur Aroni byggir á því að hann hafi með svikum komið sér og félagi sínu undan skuldum, með því að skjóta húseign að Skúlagötu 51 úr félaginu Vindasúlum ehf. inn í eignarhaldsfélagið 2007, skömmu áður en húsið var selt til kínverska sendiráðsins fyrir 875 milljónir króna, 17. desember 2009. Á húsinu hvíldu tryggingabréf í eigu banka, upp á um einn milljarð króna samtals, og töldu bankarnir að með fyrrnefndri eignafærslu hefði Aron haft af þeim um 300 milljónir, og kærðu málið í kjölfarið til sérstaks saksóknara

Eftir um þriggja ára rannsókn var gefin út ákæra.

Aron neitar sök, og bar við minnisleysi um vegamikil atriði, þar langt var um liðið frá atburðum, þegar Finnur Vilhjálmsson saksóknari hjá embætti sérstaks saksóknara spurði hann út í málsatvik en Aron lauk skýrslugjöf sinni á ellefta tímanum í morgun. Hann sagði Gísla Gíslason lögmann hafa átt í samskiptum við banka fyrir sína hönd, og að hann hefði komið að málum þegar fasteignin var færð milli félaga, skömmu áður en kínverska sendiráðið keypti húsið.

Í morgun var meðal annars vitnað til gagna sem haldlögð voru við húsleit sem embætti sérstaks saksóknara framkvæmdi 19. janúar 2010. Meðal annars voru tölvugögn þar sem samskipti Arons við bróður hans á samskiptaforritinu Skype, 22. júní 2009, um hálfu ári áður en húsið var selt. Þar kemur fram að hann sé með „nokkur plott" í gangi, eins og orðrétt sagði fyrir dómi, og ætli sér að „taka snúning" á bönkunum. Aðspurður fyrir dómi í morgun sagði Aron að hann taki stundum svona til orða, það er að taka snúning á einhverjum, sé í reynd að „gera eitthvað".

Aron sagðist alltaf kappkosta að fara að lögum, og hafi talið sig vera að gera það að öllu leyti, í fyrrnefndum viðskiptum.

Samkvæmt dagskrá Héraðsdóms Reykjavíkur lýkur aðalmeðferð í málinu á morgun.