Baldur sagður hafa selt skuldabréf áður en hert var á höftunum

Baldur Guðlaugsson, fyrrverandi ráðuneytisstjóri, sem nú afplánar 2 ára fangelsisdóm fyrir innherjasvik, er sagður hafa selt ríkisskuldabréf fyrir 190 milljónir króna rétt áður en hert lög um gjaldeyrishöft tóku gildi.

Þetta kom fram í Kastljósi í gærkvöldi. Þar segir að viðskiptin hafi verið tilkynnt Fjármálaeftirlitinu vegna tímasetningar viðskiptanna og fyrri starfa Baldurs.

Það var mánudaginn 12. mars, rétt eftir lokun markaða, sem Alþingi samþykkti með stuttum fyrirvara hert lög um gjaldeyrishöft. Þau beindust meðal annars að því að hefta útflæði á vöxtum af tilteknum flokki ríkisskuldabréfa. Þremur dögum fyrr, eða mínútu fyrir lokun Kauphallar föstudaginn 9. mars, seldi Baldur sams konar bréf fyrir 186,8 milljónir króna.

Fram kemur í Kastljósinu að þegar Baldur seldi bréfin var gengi þeirra 119 en strax eftir að hert var á gjaldeyrishöftunum féll gengið niður í 104,5.