BMW semur við Verne Global

Þýska stórfyrirtækið BMW hefur bæst í hóp viðskiptavina Verne Global á Íslandi. Bílaframleiðandinn mun sannreyna hönnuð mót fyrir nýjustu bifreiðar sínar í gagnaveri fyrirtækisins í Reykjanesbæ.

Nánar tiltekið mun Verne Global hýsa ský-þjónustu BMW sem verkfræðingar fyrirtækisins nota við hönnun nýrra bíla.

Frá því að gagnaverið tók til starfa í febrúar á þessu ári hafa fimm fyrirtæki skrifað undir þjónustusamning við Verne Global: Tölvuleikjaframleiðandinn CCP, Datapipe, GreenQloud, Opin Kerfi og nú BMW.

Verne Global er alþjóðlegt fyrirtæki sem selur þjónustu sína til stórra fyrirtækja í Bandaríkjunum sem og Evrópu.

Það er tæknifréttavefurinn Data Center Knowledge sem greinir frá þessu.