Atvinnulausum fækkaði um 1.000 manns milli ára

Á fyrsta ársfjórðungi ársins voru að meðaltali 12.700 manns án vinnu og í atvinnuleit eða 7,2% vinnuaflsins. Fækkaði atvinnulausum um þúsund manns frá sama tímabili í fyrra.

Þetta kemur fram á vefsíðu Hagstofunnar. Þar segir að atvinnuleysi mældist 7,8% hjá körlum og 6,5% hjá konum. Fjöldi starfandi á fyrsta ársfjórðungi var 163.500 manns eða 73,2% af mannfjölda. Hlutfall starfandi karla var 75,7% og starfandi kvenna 70,6%.

Þegar á heildina er litið fækkaði atvinnulausum um 1.000 frá fyrsta ársfjórðungi 2011. Körlum fækkaði þó umtalsvert meira eða um 1.800 á sama tíma og atvinnulausum konum fjölgaði um 800. Starfandi fjölgaði á þessu tímabili um 1.300. Starfandi körlum fjölgaði um 3.300 en starfandi konum hins vegar fækkaði um 2.000.

Á fyrsta ársfjórðungi ársins voru að jafnaði 176.200 manns á vinnumarkaði og fjölgaði um 0,2% frá sama tíma ári áður eða um 300 manns. Jafngildir þetta 78,8% atvinnuþátttöku. Fjöldi fólks utan vinnumarkaðar var 47.300, sem er aukning um 2,4% frá fyrra ári eða um 1.100 manns. Atvinnuþátttaka karla var 82,1% og kvenna 75,4%.

Á fyrsta ársfjórðungi 2011 voru alls 175.900 á vinnumarkaði eða 79,2% atvinnuþátttaka og utan vinnumarkaðar voru 46,200. Atvinnuþátttaka karla var 83,3% og kvenna 76,1%.