Þörf fyrir tvö stór hótel á ári

Verði árleg fjölgun ferðamanna á bilinu fimm til sjö prósent á næstu árum mun gistirýmum í Reykjavík þurfa að fjölga um 180 til 380 á hverju ári. Alls gæti því þurft 3.600 til 7.500 ný herbergi á gististöðum fram til ársins 2030. Þetta kemur fram í drögum að greinargerð fyrir þörf á gistirými í Reykjavík á árunum 2012 til 2030 sem VSÓ Ráðgjöf hefur unnið fyrir skipulags- og byggingarsvið borgarinnar.

Er þá miðað við að ársnýting gistirýma sé á bilinu 44 til 45 prósent. Greinargerðin verður lögð fram í borgarráði á fimmtudag. Gangi þessi spá eftir þarf að byggja eitt til tvö hótel á stærð við Hótel Sögu, sem hefur 203 herbergi, á ári fram til 2030 til að anna eftirspurn.

Fjöldi ferðamanna sem heimsækja Ísland hefur fjórfaldast á tveimur áratugum. Í fyrra fjölgaði þeim um 15,6 prósent frá árinu 2010. Þorri ferðamanna sem hingað til lands kemur dvelur að minnsta kosti hluta ferðar sinnar í Reykjavík. Því ákvað borgin á láta greina þörfina á auknu gistirými næstu tæpu tvo áratugina.

Við vinnslu greinargerðarinnar kortlagði VSÓ Ráðgjöf alla gististaði í virkum rekstri á öllu höfuðborgarsvæðinu ásamt upplýsingum um fjölda rúma, herbergja, upplýsingum um rekstrarleyfi, stjörnugjöf og stærð húsnæðis eftir föngum. Út frá þessum þáttum var lagt mat á stöðu mála í dag og sett fram greining á þörf á gistirými fram til ársins 2030 miðað við einfaldar framreikningsaðferðir.

Helstu niðurstöður eru þær að á höfuðborgarsvæðinu eru alls 182 gististaðir í rekstri. Þar af eru 167 í Reykjavík og 114 þeirra eru í miðborg hennar. Af gististöðum sem eru í rekstri eru 145 gistiheimili eða íbúðahótel en 37 eru hótel eða hostel. Þorri rúma er hins vegar á hótelum borgarinnar, eða 63 prósent þeirra.

Síðustu tvo áratugi hefur ferðamönnum sem koma til Íslands fjölgað um 6,3 prósent að meðaltali á ári. Í greiningu VSÓ segir að ef árleg fjölgun ferðamanna verði á bilinu fimm til sjö prósent fram til ársins 2030 muni þurfa 180 til 380 ný hótelherbergi á ári til að anna þeirri eftirspurn. - þsj / sjá bls. 6