Bandaríkjadalur besti kosturinn fyrir Ísland

Manuel Hinds, fyrrverandi fjármálaráðherra El Salvador, segir að Bandaríkjadollar sé besti gjaldmiðlakosturinn fyrir Ísland. Ísland stundi mikil viðskipti með hrávörur og Bandaríkjadollarinn sé besti kosturinn fyrir viðskipti með þær.

Hinds var meðal fyrirlesara á fundi VÍB, eignastýringar Íslandsbanka, í morgun, en þar voru kostir Íslands í gjaldmiðlamálum til skoðunar og ræddir. Hinds var ráðgjafi stjórnvalda í El Salvador þegar Bandaríkjadalur var þar tekinn upp einhliða um síðustu aldamót.

Hinds segist telja Bandaríkjadalur vera skynsamasta kostinn fyrir Ísland.

„Þetta er mín skoðun, miðað við stöðuna eins og hún er núna, að Bandaríkjadalur henti landinu best. En það verður hins vegar að taka umræðuna um þetta lengra og ræða um alla kosti sem í boði eru," sagði Hinds.

Hinds sagði enn fremur að Ísland gæti staðið frammi fyrir miklum efnhagslegum tækifærum í framtíðinni ekki síst vegna þess hve landið væri lítið, en jafnframt með vel menntað fólk og sterka undirstöðuatvinnuvegi.

Þórarinn G. Pétursson, aðalhagfræðingur Seðlabanka Íslands, var meðal þeirra sem fluttu erindi á fundinum, ásam Heiðar Guðjónssyni hagfræðingi og Ingólfi Bender, hjá greiningu Íslands.

Nánar verður rætt við Manuel Hinds í fréttum Stöðvar 2 í kvöld.