Töpuðu 50 milljörðum á tveggja ára tímabili

Sparisjóðurinn í Keflavík tapaði 50 milljörðum króna á árunum 2008-2010. Á sama tíma jukust innlán hans um tugi milljarða. Rekstrarkostnaður sjóðsins árið 2009, meðal annars launagreiðslur, var 2,3 milljarðar.

Sparisjóðurinn í Keflavík jók innlán sín um 8,5 milljarða króna á árinu 2009. Áður höfðu þau aukist um 9,8 milljarða króna á síðustu mánuðum ársins 2008. Alls jukust þau um tæp 30 prósent frá því skömmu fyrir bankahrun og fram til loka árs 2009. Á þeim tíma uppfyllti sjóðurinn ekki lágmarkskröfur Fjármálaeftirlitsins (FME) um eigið fé og starfaði því á undanþágu. Kostnaður vegna innlánasöfnunarinnar lendir á skattgreiðendum.

Alls tapaði sparisjóðurinn 46,6 milljörðum króna á árunum 2008 til 2010. Þetta kemur fram í áður óbirtum drögum að ársreikningum Sparisjóðsins í Keflavík sem Fréttablaðið hefur undir höndum og greinir frá í dag.

Í drögum að ársreikningi sparisjóðsins fyrir árið 2009 kemur fram að innlán hans hafi verið orðin 63,2 milljarðar króna í lok þess árs. Þau höfðu þá aukist um tæpa 20 milljarða króna frá miðju hrunárinu 2008.

Á sama tíma og sjóðurinn jók við innlán sín rýrnaði virði eigna hans um 17 milljarða króna auk þess sem hann greiddi um 2,3 milljarða króna í laun, launatengd gjöld og "annan rekstrarkostnað," að því er fram kemur í Fréttablaðinu.

Sparisjóðurinn í Keflavík starfaði fram í apríl 2010 þegr nýr sparisjóður, SpKef var stofnsettur. Samkvæmt drögum að ársreikningi tapaði sjóðurinn 11,9 milljörðum króna á því ári.

Eins og komið hefur fram er kostnaður skattgreiðenda vegna Spkef um 26 milljarðar króna. Fréttastofan hefur ítrekað reynt að ná í Geirmund Kristinsson, fyrrverandi sparisjóðsstjóra Sparisjóðsins í Keflavík, án árangurs.