Spá hagvexti hér á landi yfir meðaltali á heimsvísu og minnkandi atvinnuleysi

Hagvöxtur hér á landi verður 2,8 prósent á þessu ári samkvæmt spá Íslandsbanka, en ef það gengur eftir verður hann með því hæsta sem þekkist í Evrópu og yfir meðaltali á heimsvísu. Þá verður atvinnuleysi 6 prósent og mun lækka enn frekar á næstu árum.

Íslandsbanki birti þjóhagsspá sína í dag en samkvæmt spánni verður hagvöxtur þessa árs drifinn áfram af einkaneyslu, fjárfestingum og útflutningi. Þá mun innflutningur á vörum til landsins mun fara vaxandi samhliða auknum útflutningi.

Ingólfur Bender forstöðumaður greiningar Íslandsbanka segir 2,8 prósenta hagvöxt mjög góðan í samanburði við önnur Evrópuríki.

„Þau eru reyndar að takast á við erfiðleika í augnablikinu þannig að það þarf að taka tillit til þess, en þetta er tiltölulega góður vöxtur í evrópskum samanburði og reyndar einnig í samanburði við OECD-ríki almennt, en þar er að meðaltali spáð 1,6 prósenta hagvexti á þessu ári. 2,8 prósenta hagvöxtur er tiltölulega góður í þeim samanburði," segir Ingólfur.

Greining Íslandsbanka spáir 6 prósent atvinnuleysi á þessu ári, sem er nokkuð lágt í alþjóðlegum samanburði.

„Sögulega séð er þetta samt yfir því sem við vorum vön á árum áður, sérstaklega fyrir hrun, en það var óeðlilegt ástand. Mikil þensla á vinnumarkaði og nánast ekkert atvinnuleysi, þannig að ekki er rétt að miða við það. Við teljum að það muni skrúfast enn meira ofan af atvinnuleysinu. Það verði 6 prósent í ár og fari niður í 5 prósent í lok spátímabilsins, eftir tvö ár," segir Ingólfur Bender.