Arnór Sighvats: Glufurnar voru farnar að vinda upp á sig

Aðstoðarseðlabankastjóri segir breytingar á gjaldeyrishöftum auka stöðugleika og styðja við gengi krónunnar. Stoppa þurfti upp í göt á gjaldeyrishöftunum þar sem útgreiðslur í gegnum glufuna voru farnar að vinda upp á sig.

Arnór Sighvatsson aðstoðarseðlabankastjóri segir breytingar sem gerðar voru á gjaldeyrishöftunum í nótt aðallega snerta erlenda eigendur skuldabréfa og slitastjórnir föllnu bankanna. Lokað er nú á greiðslur af höfuðstól skuldabréfa í erlendri mynt en það er leið sem margir óþolinmóðir erlendir fjárfestar hafa notað til að losa sig hraðar út úr landinu með sitt fjármagn.

„Auðvitað er þetta vandamál sem er búið að vera til staðar í nokkurn tíma. Það hefur hins vegar verið að vinda hratt upp á sig að undanförnu, þetta var viðráðanlegur vandi en hann hefur magnast stig af stigi. Það eru að koma fram nýir flokkar sem hafa sömu eiginleika og þessi bréf sem erlendir aðilar hafa verið að kaupa upp í því skyni að taka út höfuðstólinn," segir Arnór.

Hann segir að það séu engin takmörk fyrir því hversu mikið flæði hefði getað farið í gegnum þessa glufu með nýjum skuldabréfaflokkum en seðlabankinn vill frekar beina óþolinmóðu fjármagni í uppboðsferli bankans sem er hluti af áætlun um losun gjaldeyrishafta.

„Við viljum styðja við krónuna en um leið losa um þessar stöður sem að koma í veg fyrir að við getum losað um höftin án þess að það valdi óstöðugleika. Með því að beina viðskiptunum í þessa farvegi sem við erum búin að opna með þessum útboðum, þá erum við einmitt að stuðla að því að þetta gerist með þeim hætti sem eru í samræmi við stöðugleika."