Íslandsbanki stækkar tvo skuldabréfaflokka

Íslandsbanki hefur lokið útboði vegna stækkunar á tveimur flokkum sértryggðra skuldabréfa sem voru teknir til viðskipta í Kauphöllinni í mars 2012.

Í tilkynningu segir að annarsvegar var 7 ára útgáfan ISLA CBI 19, stækkuð um 635 milljónir kr. á ávöxtunarkröfunni 2,90%, og hinsvegar var 12 ára útgáfan ISLA CBI 24 stækkuð um 850 milljónir kr. á ávöxtunarkröfunni 3,48%.

Bréfin voru seld til breiðs hóps fagfjárfesta. Heildareftirspurnin í útboðinu var 2.185 milljónir kr. en 68% tilboða var tekið.

Heildarstærð ISLA CBI 19 útgáfunnar er nú orðin 2.465 milljónir kr. og heildarstærð ISLA CBI 24 útgáfunnar orðin 2.350 milljónir kr. Alls hefur Íslandsbanki gefið út sértryggð skuldabréf að upphæð 8,8 milljarðar kr. frá fyrstu útgáfu bankans á slíkum bréfum í desember 2011.

Stefnt er á að bréfin verði tekin til viðskipta í Kauphöllinni þann 10. maí næstkomandi. Viðskiptavakt fyrir alla flokka sértryggðra skuldabréfa Íslandsbanka er á vegum MP banka.