Telja líklegast að bakkavarabræður eignist Bakkavör á ný

Sérfræðingar svissneska risabankans Credit Suisse telja líklegast að Ágúst og Lýður Guðmundssynir séu að fara eignast ráðandi hlut í Bakkavör á nýjan leik, en fyrirtækið er nú nánast að öllu leyti undir stjórn lífeyrissjóða og banka.

Kröfuhafar Bakkavarar Group, móðurfélags Bakkavarar, samþykktu nauðsamning á sumarmánuðum 2010 en á þeim tíma voru heildarskuldir þess 64 milljarðar króna. Starfsemi Bakkavarar er fyrst og fremst í Bretlandi en félagið framleiðir tilbúna rétti sem seldir eru í verslunarkeðjum víða.

Samkvæmt nauðasamningum stóð ekki til að breyta kröfum í hlutafé fyrr en um mitt ár 2014, en hinn 24. apríl síðastliðinn var lögð fram tillaga um að kröfuhafarnir myndu eignast nánast allt hlutafé í móðurfélagi Bakkavarar á næstunni.

Daginn eftir að þessi tillaga var lögð fram, sendi svissneski risabankinn Credit Suisse frá sér greinginu á stöðu mála hjá Bakkavör. Í henni kemur fram að kröfuhafarnir, sem eru að mestu leyti Arion banki, skilanefnd Glitnis, Lífeyrissjóður verzlunarmanna, Lífeyrissjóður starfsmanna ríkisins og Gildi lífeyrissjóður, myndu eignast 95,9 prósent hlutafjár í móðufélagi Bakkavarar eftir umbreytinguna. Afgangurinn, 4,1 prósent, yrði ennþá í eigu stofnenda Bakkavarar, bræðranna Lýðs og Ágústs Guðmundssona.

Viðbúið er að taka kröfuhafa móðurfélags Bakkavarar muni hlaupa tugum milljarða króna, en í árslok 2010 höfðu þrír stærstu lífeyrissjóðir landsins, Lífeyrissjóður starfsmanna ríkisins, Lífeyrissjóður verzlunarmanna og Gildi lífeyrissjóður, niðurfært kröfur vegna móðurfélagsins um 7,5 milljarða króna.

Sérfræðingar Credit Suisse telja að tilgangurinn með þessari endurskipulagningu, sé sá, að kröfuhafarnir vilji selja allt hlutafé sitt í móðurfélaginu. Bankinn telur að augljósustu kaupendur hlutafjárins séu bræðurnir, Ágúst og Lýður, en sérstaklega er þó tekið fram að bankinn hafi ekki vitneskju um hvaðan peningarnir ættu að koma í þeim viðskiptum.