Þurfa að útskýra þversögnina

Þeir sem staðhæfa að Seðlabanki Íslands hafi gert allt rétt í aðdraganda hrunsins og segja um leið að stöðugleiki í gjaldmiðilsmálum snúist eingöngu um góða stjórnun peningamála þurfa að skýra þversögnina. Þetta segir Þorsteinn Pálsson, fyrrverandi ráðherra og sendiherra.

Þorsteinn Pálsson skrifar vikulega pistla í Fréttablaðið. Í nýjasta pistli sínum fjallar hann um gjaldmiðlamál í kjölfar ráðstefnu Alþýðusambands Íslands í vikunni um íslensku krónuna.

Í umræðunni um gjaldmiðilinn og peningastefnuna hafa andstæðingar aðildar að Evrópusambandinu og Evrópska myntbandalaginu haldið því fram að Íslendingar geti vel haldið í krónuna, en til þess þurfi aga í hagstjórn. Þorsteinn víkur að þessum álitaefnum í pistlinum í Fréttablaðinu.

Þorsteinn segir að þó að stjórnendur Seðlabanka Íslands hafi ugglaust getað gert betur í ýmsum efnum hafi ekki verið sýnt fram á að þeir hafi gert þau afgerandi mistök að augljóst megi vera að þeir hefðu getað komið í veg fyrir innistæðulaust ris krónunnar og hrunið sem var eðlileg afleiðing af því.

Kjarni málsins sé sá að málsvarar krónunnar þurfi að rökstyðja að stjórnendur peningamálanna hefðu átt að ráða við þá markaðskrafta sem léku gjaldmiðilinn jafn grátt og raun ber vitni á opnum alþjóðlegum markaði og með hvaða ráðum.

Með öðrum orðum: Þeir sem staðhæfi að Seðlabankinn hafi gert allt rétt í aðdraganda hrunsins og segja um leið að stöðugleikinn snúist bara um góða stjórnun á krónunni þurfi að skýra þversögnina.

Þorsteinn segir að talsmenn Alþýðusambandsins og Samtaka atvinnulífsins séu sakaðir um að ganga erinda ríkisstjórnarinnar þegar þeir efni til umræðna um markmið og leiðir í peningamálum. Það sé sérkennileg ásökun því að ríkisstjórnin hafi enga stefnu í þeim efnum en Þorsteinn segir að reyndar hafi stjórnarandstöðuflokkarnir það ekki heldur.

Hægt er að lesa pistil Þorsteins í heild sinni í helgarblaði Fréttablaðsins og á hér á Vísi.