Raunávöxtun íslenskra lífeyrissjóða sú versta innan OECD

Raunávöxtun íslenskra lífeyrissjóða frá hruninu og fram til ársins í fyrra er sú langversta meðal allra þjóða innan OECD.

Þetta kemur fram í nýrri skýrslu OECD um lífeyrissjóði og frammistöðu þeirra í fjármálakreppunni frá árinu 2008 og fram til ársins í ár.

Þegar yfirlit um raunávöxtun lífeyrissjóða OECD frá árslokum 2007 og fram til ársins í ár er skoðað kemur í ljós að hún hefur verið neikvæð á Íslandi um rúm 8% á ári. Hjá lífeyrissjóðum í öllum löndum innan OECD var ávöxtunin hinsvegar að meðaltali neikvæð um 1,5% árlega á sama tímabili.

Engin þjóð kemst nálægt Íslandi hvað slæma raunávöxtun varðar hjá lífeyrissjóðum. Næst á eftir koma ástralskir og spænskir lífeyrissjóðir með um 4% neikvæða raunávöxtun að meðaltali á ári. Lífeyrissjóðir í öðrum löndum OECD koma mun betur út.

Þegar kannað er sérstaklega tímabilið frá árinu 2001 til 2010 kemur Ísland einnig illa út í samanburðinum. Raunávöxtun íslensku sjóðanna þessi ár er aðeins jákvæð um rúmt prósent á ári. Er Ísland í þriðja neðsta sæti OECD þjóða hvað þetta varðar. Til samanburðar má nefna að hjá norskum og dönskum lífeyrissjóðum var ávöxtunin jákvæð um rúm 4% árlega á sama tímabili.