ÍLS gefur út íbúðabréf fyrir allt að 20 milljarða í ár

Endurskoðuð áætluð útgáfa íbúðabréfa Íbúðalánasjóðs (ÍLS) til loka árs 2012 til fjármögnunar nýrra útlána og afborgana er 16 – 20 milljarðar króna að nafnvirði en 24 – 30 milljarðar kr. að markaðsvirði.

Þetta kemur fram í tilkynningu um endurskoðaða áætlun sjóðsins til Kauphallarinnar. Þar segir að Íbúðalánasjóður áætlar að ný útlán sjóðsins verði 15 – 21 milljarður króna á árinu 2012, þar af er gert ráð fyrir að lán til lögaðila nemi 4 - 5 milljörðum króna.

Nokkur óvissa ríkir um útlána- og útgáfuáætlanir í ljósi aðstæðna á fjármála- og fasteignamarkaði. Nákvæmar tölur um áætluð útlán og útgáfu íbúðabréfa er því ekki hægt að gefa upp. Þannig geta einstakar tölur í útboðum færst á milli ársfjórðunga og veltur það á markaðsaðstæðum hverju sinni.

Íbúðalánasjóður áætlar að greiða 54 - 60 milljarða króna á árinu 2012 vegna fjármögnunar sjóðsins.

Áætlun þessi miðast við núverandi aðstæður á fasteigna- og íbúðalánamarkaði. Verði breytingar á markaðsaðstæðum getur ofangreind áætlun breyst. Íbúðalánasjóður endurskoðar áætlanir sínar ársfjórðungslega og oftar ef þörf krefur.

Ekki er gert ráð fyrir frekari útgáfu íbúðabréfa á fyrsta ársfjórðungi 2012.