Gætu sótt 95 milljarða í sparnaðinn

Ríkið á inni á bilinu 76,6 til 94,8 milljarða króna í skatti á séreignarsparnað. Helgi Hjörvar, formaður efnahags- og viðskiptanefndar, vill skoða hvort ríkið eigi að leysa þann skatt til sín strax til að koma til móts við þá sem tóku verðtryggð lán hjá Íbúðalánasjóði. Í dag er skattlagt við útgreiðslur úr sjóðnum.

Endurskoðunarfyrirtækið KPMG kannaði málið fyrir Helga. Upphæðin fer eftir því hvort miðað er við lægsta skattþrep, 37,35%, eða það hæsta, 46,24%. Sveitarfélögin eiga sinn hluta af tekjunum og sé miðað við hámarksútsvar nemur hann 29,7 milljörðum króna. KPMG gekk út frá því að hlutur sveitarfélaganna rynni ekki til þeirra án skilyrða eða takmarkana.

Í því skyni koma þrjár leiðir til greina. Hægt væri að greiða útsvarið til sveitarfélaganna í formi skuldabréfs frá ríkissjóði sem ekki yrði byrjað að greiða af fyrr en eftir 2014. Þá er hægt að greiða útsvarið samhliða því sem lífeyrisþegar taka sparnað sinn út, en það þykir flókið í framkvæmd.

Alþingi gæti einnig sett lög um að heildarfjárhæðin rynni í ríkissjóð og tæki þannig hluta sveitarfélaganna. Kanna þarf hvort það stenst lög og hvort bæta þurfi sveitarfélögunum það upp með einhverjum hætti.

KPMG kannaði stöðu lána Íbúðalánasjóðs sem veitt voru á tímabilinu 2002 til 2008. Þau hafa verið uppreiknuð miðað við breytingu á vísitölu neysluverðs til verðtryggingar. Heildarfjöldi þeirra er rúmlega 39.200 og staða þeirra var 402,5 milljarðar í árslok 2011. Til samanburðar voru lánin reiknuð miðað við verðbólgumarkmið Seðlabankans og vikmörk þess, eða 4%.

Staða lánanna miðað við þær forsendur hefði verið 335,3 milljarðar um áramótin, eða 67,2 milljörðum krónum lægri. Það þýðir 16,75 lækkun frá raunstöðu höfuðstóls.

Helgi segir skýrsluna unna fyrir sig sjálfan og vera innlegg í umræðu um almennar afskriftir.

„Ég hef lagt til að þessi leið verði farin, en er líka opinn fyrir öðrum útfærslum, bæði á tekjuöflun verkefnisins og líka fyrir því hvernig eigi að koma til móts við fólk með verðtryggð lán. Ég er tilbúinn að styðja allar góðar tillögur í þeim efnum."

kolbeinn@frettabladid.is