Heimilisbókhald Meniga leiðandi í Evrópu

Hugbúnaðarfyrirtækið Meniga áætlar að heimilisfjármálahugbúnaður sinn verði aðgengilegur um fjórum milljónum manna um mitt næsta ár, þar á meðal í Suður-Afríku og Póllandi. Fyrirtækið er orðið leiðandi í Evrópu á sínu sviði segir framkvæmdastjóri.

Tuttugu prósent íslenskra heimila nota nú Meniga til að fylgjast með heimilisfjármálunum sínum á netinu en hugbúnaðurinn varð í mars aðgengilegur viðskiptavinum ScandiaBanken í Noregi og í júní höfðu sextíu þúsund Norðmenn nýtt sér þjónustuna.

„Við vitum ekki um neitt annað dæmi um að sambærilegur hugbúnaður hafi náð jafn hraðri upptöku og þar," segir Georg Lúðvíksson, framkvæmdastjóri Meniga. „Við erum mjög ánægð með það og í raun hefur það gerst hraðar á Íslandi, þegar við fórum fyrst í loftið hér."

Í apríl gafst viðskiptavinum ScandiaBanken í Svíþjóð kostur á að nýta þjónustuna og í næsta mánuði fer Meniga svo í loftið í Finnlandi en of snemmt er að greina frá nafni bankans sem fyrirtækið hefur samið við.

„Okkur hefur gengið mjög vel að selja kerfið. Við höfum núna náð samningum við banka og fjármálastofnanir í ýmsum löndum, meðal annars í Finnlandi, Rússlandi, Þýskalandi og erum að leggja lokahönd á samninga við banka bæði í Póllandi og Suður-Afríku."

„Það stefnir í að hugbúnaðurinn verði aðgengilegur milli 3-4 milljóna manna um mitt, eða seinnihluta næsta árs. Og virkir notendur verða eflaust vel yfir milljón þá."

Og vöxturinn kallar á fleiri starfsmenn, en þeir eru núna 25 og verða væntanlega 30 í lok þessa árs. Að ári liðnu verða starfsmenn fyrirtækisins svo orðnir 50-60 ef áætlanir ganga eftir.

„Við erum að keppa við nokkur fyrirtæki í Bandaríkjunum og Evrópu og víðar og erum þegar orðin leiðandi í Evrópu. Með þessum innleiðingarverkefnum verðum við með lang flestar innleiðingar af þessum samkeppnisaðilum, þannig að við erum einn af þessum stóru aðilum í þessum geira."