Baltasar og Leifur eru stærstu hluthafar í Truenorth

Töluverðar breytingar urðu á hluthafahópi kvikmyndaframleiðslufyrirtækisins Truenorth í janúar á þessu ári. Með breytingunni urðu Leifur B. Dagfinnsson og Baltasar Kormákur Baltasarsson stærstu eigendur fyrirtækisins, en þeir eiga 32% hlut hvor eða samtals 64%. Fjórir lykilstarfsmenn hjá fyrirtækinu eiga svo hin 36%. Það eru þau Helga Margrét Reykdal, Finnur Jóhannsson, Rafnar Hermannsson og Þór Kjartansson. Novator á ekki lengur hlut í fyrirtækinu.

Vísir sagði frá því í gær að helstu eigendur Truenorth væru Novator ehf, félag í eigu Björgólfs Thors Björgólfssonar, Leifur Björn Dagfinnsson, Sögn ehf., félag í eigu Baltasars Kormáks Baltasarssonar og Truenorth Ísland ehf. Sú frétt var byggð á upplýsingum úr ársreikningi fyrir árið 2011. Gengið var frá viðskiptunum strax í janúar og því voru upplýsingarnar úr ársreikningnum úreltar.

Hagnaðurinn Truenorth á síðasta ári nam 44 milljónum. Leifur segir að útlitið fyrir árið í ár sé mjög gott. „Það er verið að vinna að fullu í uppgjörsmálum og þetta lítur ágætlega út og lofar góðu," segir hann.