Landsbréf verða einn af eigendum Bláa Lónsins

Grímur Sæmundsen, Edvard Júlíusson og Landsbréf hf., dótturfélag Landsbankans, hafa stofnað nýtt félag, Hvatningu, utan um kjölfestuhlut í Bláa Lóninu hf.

Í tilkynningu segir að eigendur Hvatningar eru annars vegar Kólfur ehf., félag í eigu Gríms Sæmundsen, forstjóra Bláa Lónsins hf. og Edvards Júlíussonar og hins vegar Horn hf. sem er félag í stýringu hjá Landsbréfum. Horn II., sem er nýr framtakssjóður í rekstri Landsbréfa hf., hefur kauprétt að eignarhluta Horns í Hvatningu.

Í gegnum Hvatningu munu hluthafarnir vinna sameiginlega að því að styrkja Bláa Lónið hf. enn frekar, enda eru mikil tækifæri í fjárfestingu í ferðaþjónustu á Íslandi þar sem fjölgun ferðamanna hefur verið mikil og væntingar eru um frekari vöxt í framtíðinni. Hvatning er stærsti einstaki hluthafinn í Bláa Lóninu hf.

Landsbréf vænta þess að fjárfestingin í Bláa Lóninu verði fyrsta af nokkrum áhugaverðum fjárfestingum Horns II í íslensku atvinnulífi. Landsbréf eru nú um mundir að bjóða viðskiptavinum sínum að kaupa hluti í Horn II, en gert er ráð fyrir að eigið fé félagsins verði á bilinu 4-8 milljarðar króna þegar félagið verður fullfjármagnað.